आँगन खेलत घुटुरुनि धाए -सूरदास

सूरसागर

दशम स्कन्ध

राग कान्हरौ आँगन खेलत घुटुरुनि धाए। नील-जलद-अभिराम स्याम तन, निरखि जननि दोउ निकट बुलाए। बंधुक-सुमन-अरुन-पद-पंकज, अंकुस प्रमुख चिह्न बनि आए। नूपुर-कलख मनु हंसनि सुत रचे नीड़, दै बांह बसाए। कटि किंकिनि बर हार ग्रीवदर, रुचिर बाहु भूषन पहिराए। उर श्रीबच्छ मनोहर हरि-नख, हेम-मध्य मनि-गन बहु लाए। सुभग चिबुक, द्विज-अधर-नासिका स्रवन-कपोल मोहिं सुठि भाए। भ्रुव सुंदर, करुना-रस-पूरन लोचन मनहु जुगल जल-जाए। भाल बिसाल ललित लटकन-मनि, बाल-दसा के चिकुर सुहाए। भानौ गुरु-पनि-कुज आगै करि, ससिहिं मिलन तम के गन आए। उपमा एक अभूत भई तब, जब जननी पट पीत उड़ाए। नील जलद पर उडुगन निरखत, तजि सुभाव मनु तड़ित छपाए। अंग-अंग-प्रति मार- निकर मिलि, छवि-समूह लै-लै मनु छाए। सूरदास सो क्यौं करि बरनै, जो छबि निगम नेति करि गाए।।104।।